Akoko yii la o yanju wahala awọn agbẹ atawọn Fulani darandaran- Dapọ Abiọdun

 

 

Gomina Dapọ Abiọdun, tipinlẹ Ogun, ti sọ pe akoko ti wa to bayii lati yanju wahala to n waye laarin awọn agbẹ atawọn darandaran, ti wọn yoo si wa abayọri si.

 Ọkunrin yii sọrọ nibi ipade kan ti wọn ṣe fawọn fọrọ naa kan iyẹn awọn agbe atawọn darandaran nibi tawọn mejeeji ti ni aṣoju nibẹ, eyi to waye ni Ọbas Complex, Oke-Mosan Abẹokuta.

 Nibẹ lo ti sọ pe iyalẹnu lo jẹ foun pe bawo lawọn eeyan ti wọn ti jọ n gbe lọjọ pipẹ ṣe wa dẹni to n bara wọn ja.

 Nibi ipade ọhun lawọn Gomina mẹrin lati ilẹ Hausa ti wa nibẹ, awọn Gomina ọhun ni Gomina tipinlẹ Kano, Dokita Abdulahi Ganduje, Abubakar Sanni, lati ipinlẹ Niger, Alaaji Bello Mattawale, tipinlẹ Zamfara.

 Awọn yooku ni Gomina ipinlẹ Kebbi,  Atiku Abubakar Bagudu nigba ti Arakunrin Rotimi Akeredolu lati ipinlẹ Ondo naa wa nibẹ lọjọ naa.

 Abiọdun sọ pe o ṣe jẹ pe awọn eeyan ti wọn jọ n gbe lati bi ọdun meloo sẹyin ni wọn wa di ọta ara wọn bayii,idi niyii tawọn fi gbọdọ wa abayọri si nnkan to n da wahala silẹ ọhun.

 O wa mu dawọn eeyan loju pe gbogbo ọna loun yoo sa lati ri pe eto abo to peye wa fun gbogbo olugbe ipinlẹ Ogun, bẹẹ lo ni oun ko jẹ gomina ẹya kan nipinlẹ naa bi ko ṣe fawọn to n gbe nibẹ.

Gomina tun sọ pe gbogbo wọn lapapọ lo ni lati jọ fọwọsowọpọ lati rii pe iwa ọdaran dinku lawujọ. O wa lo akoko naa lati sọ pe oun ko wa lati dẹbi wahala nnkan to n ṣẹlẹ yii lori ẹnikẹni bi ko ṣe lati wa ọna bi alaafia yoo ṣejọba

 NInu ọrọ ti Gomina tipinlẹ Kano, Dokita Abdulahi Ganduje, dẹbi nnkan to n ṣẹlẹ laarin awọn agbẹ atawọn darandaran lori aini imọ ẹkọ to, ati oṣi to wa laarin wọn,o wa pe ipe pe ki wọn fopin si lati maa da ẹran lati apa north si South

 Gomina Abubakar Sanni Bello, lati Niger, pe ipe lati tete wa ọna abayọri si wahala to n ṣẹlẹ yii, ko ma baa tun yọju lọjọ iwaju.

 Arakunrin Rotimi Akeredolu, tipinlẹ Ondo, sọ ni tiẹ pe o yẹ ki wọn wa ọna to jẹ pe awọn darandaran yoo duro si ipinlẹ wọn, ti wọn yoo si faye gba awọn to ba fẹ ra maalu lati wa ba wọn nibi ti wọn ba wa.

 Nibi ipade ọhun lawọn ọba alaye naa ti wa nibẹ. Bẹẹ lawọn Miyetti Allah naa ti ni aṣoju.