Ko saye mo fawọn ọdaran nipinlẹ Ogun, ẹrọ imọ igbalode ni yoo maa tu aṣiri wọn- Abọdunrin

 

 Ọga agba fawọn ẹṣọ alaabo araalu iyẹn siifu difẹnsi nipinlẹ Ogun, Ọgbẹni Hammed Abọdunrin, ti sọ pe lati akoko yii lọ ko nii saye fawọn ọdaran lati maa lugọ ati pe eto abo to peye yoo bẹrẹ si ni wa nigba tawọn ba bẹrẹ si ni samulo imọ ẹrọ igbalode ayelujara, eyi to ni yoo tun maa tu aṣiri awọn to n lu awọn araalu ni jibiti nipasẹ ayelujara yii.

Ọkunrin naa sọrọ yii lakooko ti wọn n ṣi ibi ẹrọ igbalode ọhun, to waye lọjọ Iṣẹgun, Tusidee, ana, nileeṣẹ wọn to wa labule Owu Dekudu, Kọbapẹ, nijọba ibilẹ Ọbafẹmi Owode, nipinlẹ Ogun, bakan naa ni wọn tun lo anfaani yii lati fawọn oṣiṣẹ ọọdunrun ni igbega lati ipo kan si omii in.

Ọga agba ọhun ṣalaye idi ti wọn fi gbe ẹkọ tuntun naa kalẹ lati tun le lo ọgbọn atinuda lọna igbalode lati maa fi tu aṣiri iwa ọdaran lawujọ.

 O sọ pe pẹlu akọsilẹ tawọn ni  ida ọgọrin (80%) to jẹ ọdaran lo jẹ pe ori foonu lo ti n waye, ti wọn fi n lu awọn araalu ni jibiti. O wa ni ẹka ti wọn ṣi lọjọ naa lo ti ṣetan lati maa lo imọ ẹrọ lati ṣewadii awọn nọmba to ba hu iwa buruku ọhun lawujọ.

O wa mu dawọn eeyan loju pẹlu ileri pe ẹni tọwọ ba tẹ lori ẹsun yii lawọn yoo fi jofin. Nitori pe ko sibi ti imọ ẹrọ igbalode naa ko de kaakiri orileede yii ati oke okun ni.

Nibi eto ọhun naa ni wọn tun ti fi ami ẹyẹ dawọn kan lọla, lara wọn ni Gomina Dapọ Abiọdun, ẹni ti akọwe ijọba Tokunbọ Talabi, ṣoju fun.Edward Ajogun, toun jẹ kọmisanna fawọn ọlọpaa nipinlẹ Ogun, atawọn eeyan mii in.

Nigba to n sọrọ lorukọ Gomina nibi eto ọhun, Ọgbẹni Tokunbọ Talabi, fi idunnu ẹ han lori agbekalẹ imọ ẹrọ ti wọn ṣi lọjọ naa, eyi to ṣapejuwe gẹgẹ bi ọna ti yoo mu iwa ọdaran dinku lawujọ,

O wa gba ajọ siifu nimọran lati tan iru imọlẹ yii si awọn ẹka alaabo yooku to wa nipinlẹ Ogun, nitori iṣẹ ọpọlọ ni. O wa gbadura ki Ọlọrun maa tubọ ran wọn lọwọ.