Awọn ọlọkada ko gbọrọ si Dapọ Abiọdun lẹnu o

Lalẹ, ana, ni Gomina Dapọ Abiọdun, tipinlẹ Ogun, fofin de awọn ọlọkada lati ma ṣe ṣiṣẹ fọjọ, nitori iwọde lati fopin si awọn ọlọpaa kogbregbe, iyẹn EndSars, to n lọ lọwọ, ṣugbọn iyalẹnu ni pe awọn ọlọkada naa ko gbọrọ sijọba lẹnu nitori titi di akoko yii ni wọn ṣi n ba iṣẹ wọn lọ nigboro.

Nibi ipade ti Gomina bawọn oniroyin ṣe ọhun lo tun ti paṣẹ pe ki wọn ti gbogbo ileewe pa lati oni Ọjọruu, Wẹsidee titi di ọjọ Aje Monde, ọjọ kẹrindinlọgbọn, oṣu yii.

O sọ pe gbogbo ọna nijọba n wa lati rii pe iwọde tawọn ọdọ n ṣe ko mu itajẹsilẹ dani ṣugbọn bi nnkan ṣe n lọ yii bawọn ko ba tete gbe igbesẹ yoo di nnkan tagbara ko ni ka mọ.

O tun ṣalaye pe ko to di pe oun bawọn oniroyin sọrọ loun ti ṣe ipade pọ pẹlu awọn eleto abo nipinlẹ yii nibi tawọn ti jọ fori kori lati wa ọna abayọ. O  ni awọn ko fẹẹ ki konile-o-gbele waye idi niyii tawọn fi kọkọ gbe awọn igbesẹ naa.

Dapọ Abiọdun tun ṣalaye pe oun fẹẹ kawọn akẹkọọ forikori lati yan aṣaaju ki wọn jọ jokoo papọ sọrọ lati wa ọna abayọ, nitori awọn ko fẹẹ wahala ṣugbọn iroyin tawọn n gbọ ati bi wọn ṣe pa ẹṣọ aṣọbode lana-an mu ibanujẹ ọkan wa.

O ni ijọba yoo wo igbesẹ naa laaarin wakati mẹrinlelogun, ki wọn to gbe igbesẹ mii in. Ṣugbọn iyalẹnu lo jẹ pe awọn ọlọkada ko pa ofin naa mọ, ti wọn si sọọ di ko kan mi.