Pakute iku ni biriji ti Dapọ Abiọdun ṣe fawọn araalu ni Ọpako- Adigbẹ- Ọginni

 

Ọgbẹni Sunday Ọlapọsi Ọginni, to jẹ alaga fẹgbẹ oṣelu New Nigeria Political Party, NNPP, nipinlẹ Ogun, ti sọ pe iṣẹkiṣẹ ati pakute iku ni biriji ti Dapọ Abiọdun ṣe, ti ko tii pe ọdun kan, si Ọpako lọna Adigbẹ, to ti dawolẹ bayii jẹ fawọn araalu, ti ko si bojumu.

Ninu atẹjade kan ti alaga naa fi sita lo ti sọ pe ẹdun ọkan lo jẹ fawọn araalu ati ẹgbẹ oṣelu naa pe ijọba to wa lode le ṣe iru iṣẹ ajanbaku yii, eyi to fi han pe wọn kan fẹẹ ma na owo ijọba ni inakuna pẹlu awọn iṣẹkiṣẹ yii.

Alaga naa tun sọ pe bi agbara ṣe gbe biriji Ọpako- Adigbẹ naa lọ lai ti pe ọdun kan jẹ kawọn araalu mọ pe jibiti ati ọna ti ko bofinmu ni wọn ṣe sibẹ, o ni iṣẹ akanṣe naa jẹ eyi ti ko ni atẹwọgba awọn araalu ninu.

O ni bi a ko ba ni parọ, o yẹ ki Dapọ Abiọdun tọrọ idariji lọdọ awọn awọn araalu lori nnkan to ṣẹlẹ naa.O lou n ka kun aimọto isejọba to wa lode yii.

Ọginni tun sọ pe nnkan toun sọ nigba kan niyẹn pe ijọba to wa lode yii ko kun oju oṣuwọn lati gba ẹyawo biliọnu aadọta-le- nigba naira ẹyawo ti wọn fẹẹ gba, nitori awọn mọ pe inakuna ni wọn fẹẹ na.

A o ranti pe lọdun to kọja, nijoba Dapọ Abiọdun bẹrẹ iṣẹ lori afara iyẹn biriji to wa ni Ọpako-Adigbẹ fawọn araalu lati maa gba ibẹ kọja, ṣugbọn o ṣe ni laanu pe agbara ojo gbe gbogbo afara naa lọ, lai pe ọdun kan ti wọn bẹrẹ ẹ.

Gbogbo awọn to si n gbe laduugbo naa ni inu wọn ko dun si nnkan to ṣẹlẹ naa. Ni bayii, a gbọ pe gbogbo ọna nijọba fi n wa atunṣe si ọna naa, tiṣẹ si ti bẹrẹ ni pẹrẹu