Ẹni ti ko ba lo ibomu nipinlẹ Ogun yoo fẹwọn oṣu mẹfa gbara- Dapọ Abiọdun

 

Gomina Dapọ Abiọdun ti paṣẹ pe gẹgẹ bi gomina ipinlẹ Ogun ati labẹ ofin to foun laaye lati ṣofin, ẹnikẹni nipinlẹ naa ọhun ti ko ba lo ibomu tọwọ ba tẹ yoo fẹwọn oṣu mẹfa gbara.

Lakooko to n ba awọn oniroyin sọrọ nirọlẹ ọjọruu Wẹsidee, lo ti sọ pe ijọba ko nii foju aanu wo ẹnikẹni to ba tapa si ofin ibomu lawujọ lati dena arun korona fairọọsi to gbode lati bi  oṣu meloo kan ṣẹyin.

Bakan naa lo tun sọ pe ko ni saaye fun ariya tabi kiko eeyan jọ lakooko ọdun ileya ti yoo waye lọjọ Ẹti, Furaidee, to n bọ yii fawọn ẹlẹsin musulumi.

O ni ko si nnkan to n jẹ yidi lọjọ naa gẹgẹ bi ilana ati abayọri pẹlu ajọ musulumi to ga ju lọ iyẹn Nigerian Supreme Council for Islamic Affairs (NSCIA).

O wa rọ gbogbo awọn musulumi lati rii pe wọn ṣe ọdun naa nile wọn, ki wọn si rii pe wọn pa ofin ati ilana arun korona mọ lọjọ naa. Gomina ni bi wọn ṣe itunu awẹ gẹlẹ ni ki wọn ṣe ti ileya naa.

Nigba to n sọrọ nipa iwọle awọn ọmọleewe,Dapọ Abiọdun, sọ pe lọjọ kẹrin, oṣu to n bọ yii ni kawọn to wa ni ikangun aṣekagba iyẹn SS3 wọle fun imurasilẹ idanwo aṣekagba wọn ti wọn fẹẹ ṣe.

Ọsẹ meji gbako lo ni awọn ọmọleewe ọhun yoo fi ṣagbeyẹwo awọn ẹkọ wọn ko to di pe wọn yoo bẹrẹ idanwo aṣekagba,oniwe mẹwaa, iyẹn WAEC, lọjọ kẹtadinlogun, oṣu kẹjọ, ọdun yii.

Bakan naa lo ni bi nnkan ba lọ bawọn ṣe fẹ tawọn ile ijọsin si ti gbe awọn igbesẹ tawọn la kalẹ fun wọn, to ba di ọjọ kẹrinla, oṣu to n bọ ni wọn yoo ṣi wọn, ti wọn yoo si pada lọ maa jọsin wọn.

Amọ ṣa, Gomina Dapọ Abiọdun ni ko to digba naa ki nnkan ṣi maa lọ bo ṣe wa tẹlẹ, nipa pe wọn yoo ṣiṣẹ laaarin ọjọ Aje, Monde si Furaidee, nigba ti igbele yoo waye lọjọ Abamẹta ati ọjọ Aiku.

Bẹẹ lo ni kawọn ile igbafẹ ṣi wa ni titi pa nigba ti igbele laaarin ago mẹwaa alẹ si mẹrin si n tẹsiwaju. O wa dupẹ lọwọ gbogbo ọmọ ipinlẹ Ogun lori bi wọn ṣe fọwọsowọpọ lati dẹkun arun korona fairọọsi ọhun.