Korona fairọọs; Sẹnetọ Tolu Ọdẹbiyi fẹẹ fun ẹgbẹrun meji mọlẹbi lounjẹ ọfẹ.

Ninu erongba ẹ lati fọwọsowọpọ pẹlu ijọba ipinlẹ Ogun lori ku-diẹ-ku- diẹ to n deba eto ọrọ aje ti nnkan ko lọ bo ṣe yẹ ko lọ, nitori arun koronafairọọs to  gbode, to mu kawọn eeyan wa ni konile-o-gbele, Sẹnetọ Tolu Ọdẹbiyi, to n ṣoju ẹkun Yewa, iyẹn Ogun West, tun ti pese awọn ẹbun ounjẹ loriṣiriṣi fawọn eeyan ẹ.

Gẹgẹ bi atẹjade to jade lati ọfiisi iroyin Aṣofin naa, lo ti sọ di mi mọ pe lori ọna lati fopin si ebi lakooko idaamu koronafairọọs nipinlẹ Ogun, awọn ounjẹ bii apo gari onikilo mẹwaa, apo irẹsi toun naa jẹ kilo mẹwaa, pali indomiini ni wọn fẹẹ pin fawọn ẹgbẹrun meji mọlẹbi ni ẹkun Ogun West.

Tolu Ọdẹbiyi tun sakiyesi pe pẹlu iwoye bi arun koronafairọọs naa ti n ṣe n tan kaakiri orileede yii, to mu ki ofin konile-o-gbele ati iṣede waye, oun yoo ri pe oun ṣakitiyan lati maa pese ounjẹ loorekoore fawọn eeyan ẹ, ki wọn fi le koju ipenija ti wọn ba n ba pade lakooko taa wa yii.

O tun wa lo akoko naa lati fi ẹmi imoore ẹ han si Gomina ipinlẹ Ogun, Ọmọọba Dapọ Abiọdun, MFR atawọn eeyan igbimọ ẹ lori bi wọn ṣe fọwọsowọpọ  lati gbogun ti korona fairọọs, to mu aifọkanbalẹ wa lati bi oṣu meloo sẹyin.

Bẹẹ lo tun rọ awọn eeyan agbegba ẹ ati ipinlẹ Ogun lapapọ lati ri pe wọn pa awọn ofin ti wọn la silẹ fun wọn mọ, ki wọn si sọra fun ifara-kan-ẹni, pẹlu adura pe ki Ọlọrun pa gbogbo wa mọ, ki a le bori arun yii.