Ibi tawọn oṣiṣẹ alaabo ba ti lu araalu lakooko yii, ẹ jẹ ki a gbọ- Ọga agba Siifu

Ọga agba fun ileeṣẹ to n ri si abo araalu, iyẹn Siifu, nipinlẹ Ogun, Alaaji Ahmed Abọdunrin, ti rọ awọn araalu pe ibi ti wọn ba ti ri i pe awọn alaabo ti wọn wa nigboro jakejado ipinlẹ naa fun ti konile-o-gbele to n lọ lọwọ ba ti na awọn kọlọransi, ki wọn tete jẹ kawọn n gbọ, nitori wọn ko fun wọn laṣẹ bẹẹ.

O sọrọ yii lakooko to fọrọwerọ pẹlu akọroyin BO ṢE RI ni ọfiisi ẹ nipa igbaradi wọn lori konile-o- gbele to ti bẹrẹ bayii nitori arun koronafairọs to gbode. O ni kaka bẹẹ awọn ti la awọn ọna to dara ju ki wọn na eeyan lọ silẹ fawọn tọwọ ba tẹ.

Ọkunrin naa sọ pe ko to di pe eto naa bẹrẹ lawọn ti fi iriri wọn lati ma jẹ kawọn eeyan wọle lati awọn ipinlẹ to mule tipinlẹ Ogun bẹẹ lawọn ko si jẹ ki wọn jade ṣe  igbaradi wọn, ati le koju awọn iṣoro kekekee nigba ti igbele ọhun ba bẹrẹ.

Lara awọn nnkan tawọn foju ri ni pe awọn eeyan ko tẹle ofin tijọba la kalẹ, ko ti i mọ wọn lara daadaa. O ni awọn ṣi n rawọn eeyan to fẹẹ wọle bẹẹ lawọn to fẹẹ kọja si Eko, Ibadan ati Ondo,  o ni teeyan ba tapa si ofin o yẹ kawọn mu wọn.

Abọdun ṣalaye pe’ Ṣe ẹ ri igbelewọn ka jinna si ara wa, ko le gba ka mu eeyan, ka ti i mọle, ẹni ti ẹ fẹẹ ti mọle gan-an,ẹ o mọ boya arun kan wa lara ẹ. A ti wa dọgbọn kan ta a pe ni itimọle ti ko ni kọkọrọ. Ẹni ta a ba ni ko pada sibi to ti n bọ, to ba ba wa lagidi, awa o nii ba a  ja, a o mu pẹlu mọto tabi kẹkẹ ẹ to wa, a o fi sibi to jẹ ibi gbangba, o le jẹ papa ti wọn ti n ṣere, ti wọn yoo fi jinna si ara wọn, pe ki wọn jokoo sibẹ. Nigba ti yoo ba fi lo wakati meji si mẹta, a mọ pe oun lo maa bẹbẹ  pe, ta a ba fẹ koun lọ sibi toun lọ, ki wọn jẹ koun pada sile’.

O ni ko ti ye awọn eeyan daadaa, ikeji ni pe ẹni to ba tapa si ofin, ko sibi tawọn fẹ ti wọn mọ.  Awọn si ti ri ọgbọn da, to kọja nina. Pẹlu gbogbo eleyii, o ni yoo jẹ ki ofin konile-o-gbele rinlẹ, ko nii nira rara..

Ọga agba Siifu tun fi kun ọrọ ẹ pe “A ti ṣe idanilẹkọọ fun ọọdunrun oṣiṣẹ wa, lati kọ wọn bi wọn yoo ṣe ṣiṣẹ, a tun da wọn lẹkọọ lori idabobo ara wọn, nitori ẹni to ba wa ni alaafia ni yoo le ṣiṣẹ idabobo fun eeyan, tawọn naa ba ti wa ni wahala, ko si bi wọn ṣe le fẹẹ ṣe, a ṣe idanilẹkọọ lori abo tara wọn.

Fun akọkọ, awọn oṣiṣẹ bii ọọdunrun ti gba idanilẹkọọ, tawọn  yẹn ba ṣiṣẹ tan, nitori iṣẹ yii ki i ṣe mo wa laaarọ, mo fẹ lọ sile, iṣe aṣeyipo ni. Awọn kan yoo wa ni aarọ, awọn kan ni alẹ. Nitori awọn kọlọransi ti wọn le maa roo pe bi wọn ko ba jẹ kawọn jade ni aarọ, awọn a jade ni alẹ”.

O ni bi ọsẹ akọkọ ba lọ tan, awọn tun fẹẹ bẹrẹ awọn igba oṣiṣẹ mii- in, lati fun wọn ni idanilẹkọọ,.ti ko fi ni wọ awọn iṣi akọkọ lọrun. Gbogbo wọn lapapọ, lo ni wọn  jẹ ẹẹdẹgbẹta oṣiṣẹ tawọn fẹẹ lo.

O wa ṣe ikilọ pe kawọn ọdaran ma ṣe lo akoko yii pe ko sibi ti wọn ti wọn mọ, ti wọn ba daran ṣiṣẹ ibi, ki wọn maa wa fi daran kaakiri, o ni iiyẹn a le koko, nitori awọn yoo kọkọ fi pankẹrẹ fin ara onitọhun, lati ma jẹ ki aisan to wa lara ẹ ran ẹlomin in, awọn yoo ti mọle. O ni oun mọ pe ijọba apapọ yoo ti maa ṣeto, ibi ti wọn maa fi awọn ọdaran si, ti arun to wa nita, ko nii ran wọn.