O tan Wọn sọ Amosun di Baba alawada nipinlẹ Ogun

Beeyan ba sọ pe oun ko nii rẹrin ko ni mọgba ti yoo ba eyin ẹ nita lori nnkan to n ṣẹlẹ ninu ẹgbẹ oṣelu All Progressive Congress iyẹn APC nipinlẹ Ogun, eyi to mu kawọn eeyan sọ Gomina Ibikunle Amosun atawọn eeyan ẹ di alawada ti wọn si n gbe fiimu oriṣiiriṣi jade.

Ko si nnkan mi-in to si n faa bi ko ṣe bi Gomina naa ṣe n gba iwaju ati ẹyin latigba ti wọn ti bẹrẹ igbaradi fun ibo pamari ẹgbẹ naa to si sọ ara ẹ di apanilẹrin.

Bawọn ọmọ ẹgbẹ kan si ṣe n sọ yii afaimọ ki Gomina naa atawọn ọmọ ẹyin ẹ maa wọ ẹwu ẹtẹ nitori bi wọn ṣe ni gbogbo bi wọn ṣe n ṣe ọhun, ko dun mọ awọn alaṣẹ wọn niluu Abuja ninu, eyi to mu ki wọn ti rẹkẹ wọn silẹ.

Ipade akọkọ ti Gomina naa ti kọkọ ṣe ni wahala ti bẹrẹ nibi ti Amosun ti sọ pe ipinpo tawọn oloyinbo pe ni Consencus lawọn yoo ṣe ṣugbọn tawọn ko ba  rii ṣe awọn yoo ṣe ibo gbangba laṣa n ta iyẹn Direct.

Ṣugbọn bigba ti wọn lo ti mọ ibi to n lọ lọjọ naa nitori bo ṣe ni ori ọrọ oun loun wa pe oludije to ba wa lati Yewa loun yoo faramọ lati dije fun ipo gomina lọdun to n bọ, eyi tawọn Ijẹbu yari pe ko si nnkan to n jẹ ipinpo darẹẹti lawọn yoo fọwọ si.

Ki ilẹ ọjọ keji to mọ awọn agba Yewa ti wọn jẹ ọmọ ẹyin Amosun ti fa Abdulkabir Akinlade kalẹ gẹgẹ bi ẹni tawọn mu, ti wọn si ni kawọn oludije yooku lọọ joko jẹ.

Latigba naa ni Amosun atawọn eeyan ẹ ti wọn pe ni alawada naa ti bẹrẹ si ni pin ipo fawọn ipo to ku ti wọn yoo dije fun laarin ara wọn. Koda ẹṣẹ ni wọn tun yọ si ara wọn nigba ti awọn alatileyin oloṣelu kan fariga pe nnkan ti wọn ṣe ko tẹ wọn lọrun.

Ohun to n jẹ ki ọrọ naa tun buru si ni ti Alaaji Tajudeen Bello to jẹ ọkan lara awọn oloye ẹgbẹ  APC lapapọ niluu Abuja to yẹ ko la awọn oloṣelu ọmọ ẹgbẹ wọn lọyẹ nipa nnkan ti ofin la kalẹ nipa pamari ti wọn fẹẹ ṣe yii to jẹ pe oun naa tun wa lẹyin Gomina ti wọn tan awọn ọmọ ẹgbẹ wọn jẹ.

BOṢERI gbo pe awọn oludije kan ti wọn fẹẹ dije lawọn ipo labẹ ẹgbẹ oṣelu APC nipinlẹ Ogun ti wọn ka Gomina naa si alawada ti lọọ gba fọọmu, ti wọn si tun tii daa pada pẹlu ireti pe ipinpo ti Amosun ṣe ko kan awọn, darẹẹti gan-an lawọn fẹẹ ṣe

Bakan naa la tun gbọ pe ọkan lara awọn oludije gomina lati Yewa ti ipinpo naa ko tẹ ẹ lọrun naa ti pada lọọ gba fọọmu.

Bi nnkan si ṣe n lọọ yii, afaimọ kawọn oloye ẹgbẹ lapapọ atawọn igbimọ ti wọn yan fun pamari ma da Amosun atawọn eeyan ẹ to pin ipo fun nu, ki gbogbo wọn si pade ni pamari. Eyi o wu ẹ wi, tinu mi maa ṣe lo n ṣẹlẹ lọwọ bayii